Dili, 26 abril 2021 (TATOLI)- Assosiasaun Emprezariu Joventude Xineza Timor-Leste (AEJXTL) oferese nesesidade bazika ba vitima dezastre natural iha postu Administrativu Laclo, Munisipiu Manatuto.
Nesesidade bazika ne’e entrega direita ba ekipa Halibur Laklo-Anan iha postu umanitariu area Taibessi, Aldeia Haslaran, Suku Bemori, Postu Administrativu Na’in-Feto, Munisipiu Dili, domingu ne’e.
Notisia relevante: Xanana halibut Manatuto-anan apoia vitima dezastre iha Manatuto
Reprezentante AEJXTL, Rudi Kwan, hateten dezastre natural ne’ebe akontese iha 04 abril, halo populasaun lakon sasan uma-laran no balun lakon-vida, tanba ne’e ho apoiu oituan ne’ebe iha, bele rekopera situasaun ne’e.
“Ami simu pedidu hosi postu halibur Laclo-Anan, ami oferese foos saka 100, roupa 2.000, sapatu 300, xinelus 200 ho sasan nesesdidade seluk-ta, “Ruddie Kwan informa ba jornalista-sira iha Taibessi.
Koordenador ekipa Halibur Laclo-anan, Antonio Carceres de Carvalho agradese ba domin ne’ebe oferese hosi AEJXTL, atu bele tulun maluk afetadu-sira iha laclo.
Ami agradese ba apoiu ne’ebe maluk-sira oferese ona. Nu’udar Timoroan, ami apresia ho maluk xineza sira-nia laran di’ak.” nia agradese.
Antes ne’e, Administrador Postu Administrativu Laclo, Samuel Rodrigues Pereira, relata, dezastre natural ne’ebe akontese rezulta ema na’in-ida isin mate hetan ona, no na’in-lima seluk seidauk hetan.
Alende ne’e, inundasaun mos estraga natar ektare 5.000, estraga to’os ektare 200, mota sobu kolam-ikan 60, inklui lori plantasaun ho natural.
Dadus ne’ebe autoridade-sira hosi suku Hohorai, Lacumesac, Uma kaduak no uma naruk rekolla, iha uma tolu (3) hetan estragu total uma 25 bee tama no uma 28 sai ameasa boot ba inundasaun.
Oras ne’e daudaun vitima-sira evakua provizoriu iha sede suku no salaun parokial, hodi hein situasaun rekopera, sei fila-fali atu hadi’a sira-nia hela-fatin.
Jornalista: Eugenio Pereira
Editor: Cipriano Colo
Leave a Reply