SISD-HOHO-RAI, 06 AGOSTU 2026 – Relasiona ho lalaok komunidade nian ne’ebe husik animal livre hodi estragus ai-han iha tos laran, maka iha fulan dezembru tinan 2024, Autoridade suku Hoho-Rai, Postu Administrativu Laclo, Munisipiu Manatuto implementa ona lei tara bandu.
Xefi Suco Hoho-Rai Antonio Nunes Soares ba Ekipa Sentru Informasaun Suku Dijital, Tersa (04/08) semana ne’e esplika lei tara bandu ne’ebe implementa iha Suku Hoho-Rai bazeia ba keixa husi komunidade rasik katak iha animal balun maka husik livre hodi halo estragus ba ai-han no ai-horis sira iha tos laran.
“Ami Estrutura Suku hamutuk ho Xefi Aldeia, Lia Nain, OPS, Administrador Postu no Munisipiu, hamosu lei tara bandu bazeia ba keixa sira ne’ebe komunidade sira hato’o katak iha animal balun ne’ebe husik livre hodi halo estragus ba ai-han no ai-horis sira ne’ebe maka komunidade balun kuda iha tos laran, tanba ne’e maka ami hamosu lei tara bandu hodi regula komunidade sira ne’ebe iha animal atu bele sulan ou kesi nune’e labele fo’o impaktu ba ai-horis no ai-han sira iha tos laran”, dehan Antonio.
Lideransa Suku Hoho-Rai ne’e mos haktuir iha lei tara bandu ne’e hamosu sensaun ka multa ba komunidade sira ne’ebe husik sira nia animal lao livre hanesan kuda, karau, fahi no bibi.
“Ami implementa ona lei tara bandu ne’e iha tinan 2024 liu-ba iha ami nia Suku Hoho-Rai ho sansaun balun ne’ebe maka ami iha estrutura suku, aldeia, OPS, Postu no Munisipiu aprova ona katak bainhira iha komunidade balun maka husik nia animal hodi estragus ai-horis no ai-han iha tos laran no hetan keixa no resolve iha aldeia, entaun animal nia nain sei multa ho osan limanulo resin lima dollar Americano ($ 55), sigaru slop ida, Tua sabu litru lima masa ida, fos saka ida no bua malus bainhira hetan solusaun maibe kuandu la hetan solusaun ba problema refere no kontinua resolve iha suku maka animal nia nain sei multa ho osan atus ida resin dollar Americano ($ 110), sigaru slop rua, Tua sabu litru sanulo masa rua, fos saka rua no bua malus bainhira hetan solusaun, Xefi Suku ne’e hateten.
Antonio informa maske Autoridade suku Hoho-Rai hamuutk ho Autoridade posto, official polisia suku no autoridade munisipiu implementa ona lei tara bandu iha suku Hoho-Rai maibe to’o oras ne’e seidauk iha keixa ida husi komunidade sira konaba animal lao livre hodi estraga ai-han no ai-horis iha komunidade nia tos.
Tanba ne’e, Xefi Suku Hoho-Rai ne’e husu ba komunidade sira liu-liu ba komunidade sira ne’ebe hakiak animal hanesan kuda, karau, bibi no fahi tenke halo luhan no kesi atu nune’e labele halo estragus ba ai-han no ai-horis sira iha tos laran.
Hakerek Nain : Grupu II – Ekipa SISD-Hoho-Rai
Editor : Ekipa JPD – SEKOMS
