Grau no diploma sira maka ezijénsia administrativu de’it, maibé lideransa loloos mak moris hamutuk ho emosionalmente no serbisu hamutuk ho komunidade sira.
Fraze ida ne’e monu lolos ba eis xefe do suco Hohorai Renaldo Amaral Soares ho kodiku “Lelo” ne’ebe moris iha Hatu Ermera loron 14 fulan Febreiru tinan 1965.
Iha tempu defisil nia laran, maske la kuinece ramu siencia sira Renaldo habrani an ho ninia inisiativa rasik hamutuk ho kolega sira seluk iha tinan rihun ida atus sia, hitu nulu resin neen (1976) hahu dadaun involve an iha Forca Milisia Falintil iha komando Dima iha mometu ne’eba.
Imagen: Equipa formando/a SISD reprezenta husi Sekretariu Suco (Bernadino do Rego Saores) Suco Hohorai halao hela dadalia ho Lia nain Renaldo Amaral Soares” Lelo” iha sede suco Hohorai (foto: Marcelino 3/8)
Mane ho altura 160 cm ne’e maske la iha edukasaun ne’e boot, nia la konsege finaliza ninia estudu iha ensino primaria to’o deit iha klaze lima (5) ninia involvementu iha luta ba libertasaun nasional kontinua lao iha momentu ne’eba, wainhira seitor komando Dima inimigo sira deskobre tiha ikus mai seitor komando ne’e membros sira halai namokari hodi salva an husi inimigu sira no membros sira barak mak halai ba iha ilha Ilumanu suco Uma Kaduak posto administrativu Laclo Maunicipiu Manatuto.
Veterano oitu a qatorzi ne’e kontinua ninia atividades sira maske hetan presaun oin-oin husi inimigu sira, iha ilha Ilmanu populasaun mate barak iha inimigu sira nia liman no obriga Reinaldo tenki fila fali ba ninia rai moris fatin Hatu Ermera, maibe liu deit tempu balun inimigu sira kaptura nia no lori ba komando Berekou hodi halo interogatoriu no konsentrasaun iha momentu ne’eba.
Renaldo ne’ebe gosta bidu tradisional ne’e iha tinan rihun ida atu sia walu nulu resin rua (1982) dala ida tan forca inimigu sira kaptura tan nia no lori ba Dili, hodi hatama escola SDN. Nú. 6 Bemori Dili.
Imagen: Formanda SISD Suco Hohorai Anarela Martins Sarmentu dada lia hela ho Renaldo Amaral Soares” Lelo” wainhira halo Pratika Intervista (foto: 06/8)
Maske hetan ameasa oin-oin husi inimigu sira, maibe la hamate vontade ninia rezistensia ba luta ukun rasik an, nune’e iha tinan rihun ida atus sia, sia nulu resin rua (1992) nia involve an iha organizasaun doze-doze (12-12) no inklina mos iha organizasaun sagrada familia.
Husi involvementu iha organizasaun rezistesia sira, halo Reinaldo kuinece ona lalaok serbisu sira nune’e iha tinan rihun ida atus sia, sia nulu resin haat (1994) hetan konfiansa asumi responsablidade no simu knar hanesan sekretariu Nurep iha zona 28 de outobru hamutuk ho Francisco Soares ho kodiku Frans Mau to’o iha tinan rihun ida atus sia sia nulu resin sia (1999).
Hafoin referendum Reinaldo kontinua halao ninia atividades sira nudar povu agrikultor bain-bain iha ninia rai moris fatin, ho esperincia involvementu iha rede kladestina sira, nune’e iha tinan rihun rua walu (2008) komunidade suco Hohorai fo fiar no hili Reinaldo hodi asumi responsablidade nudar xefe do suco durante mandatu tinan hitu nia laran (2008-2015).
Iha ninia mandatu nudar xefe do suco maske la halo buat barak iha suco Hohorai maibe gerasaun foun husi uma lisan Liki-Tauade konsege harii infrastruktura baziku balun hanesan sede de suco, Kapela, sala de partos, bee mos no estradaa ligasaun entre aldeia Miri huhun.
Hakerek : Equipa Formado/a Sentru Informasaun Suco Dijital (SISD) Suco Hohorai
Editor : Equipa formando Jornal Parede Dijital (JPD) DNDM-SEKOMS
